Kako se prosvitlit?
Mijor puta son se već prosvitli
i zamroči
i somo će vrog znat koliko put
će to bit jepeta
Ka son bi moli
pokojni ćaća
me zno posvitlit triskon
a mater bi me bila stavila
klečat u kut
sve da se prosvitlin
i niko hi ni pita da mučidu dite
to je sve bilo za dobro
i za prosvitlit se
i bija je metod ča je čini čuda
i posli son se zno prosvitlit
kad son se parvi put bušiva sa curon
pok se uči kako to činit
a još boje san se prosvitli
kad son se napi
bi son prosvitljen kako svetac
a kako san običan čovik
tin mi se nočin za postat svetac ni puno svidi
pa se sad samo digod pridveče bokun prosvitlin
za ne zaboravit
kako je bit prosvitljen
arivalo je i novo vrime
a šnjin i puno novih nočinih za prosvitlit se
u duhu i u tilu
toliko je tih nočinih da se dobota ištufon
i već ne znon koji bi nočin vaze
ištufon
ugosin letriku o prosvitljenu kamaru
da bude mrok
i gren spat!
Neven Dužević
