BEZ MUDANTINIH

0
940
Foto: Mario Purisic -Unsplash

 

BEZ MUDANTINIH

jedon put zaboravi
san vazijest mudantine
a bilo je vruće
i vrime od kuponja
ča učinit?
di se smočit?
di se u more kalat
a od sroma ne umrit
a bi san mlod
i bilo me stroh
od none
od matere
od oca
od popih
od svita
od barbe
od tete
od pasa

i ploti san
sa ono malo pinezih
kaić za pložu
di se kupodu goli
i posta san grišnik

lega san ka kruh pod peku
ispod sunca
sakri se u škrapu
da ne vididu sramote
gleda ka pristrašeni zec
cice i guzice
i ono još ča se ne mi reć
a bi je suhi kamik
i sve je bila veliška peć

i misli san u sebi
tako izglijedo pakol
kad umreš
hitidu te golega pod peku
i tote već ni sposa
ni kuće
ni posteje
ni ispovidi

hiti san se neka me more proguca
ali ni itilo
pok san lega u škrapu
i penso
zoč san vidi
tote na ten grišnen mistu
onu molu
i još golu

a kad smo išli nose
u kaiću
ta molo
lipo obučena
podsmihivala se na me

i bi je veliki don
jer san vidi
da čovik ostaje čovik
i kad je gol
i paso me srom….

Neven Dužević

Komentiraj

Please enter your comment!
Please enter your name here