BOŽIĆ

0
270

Foto: Jason Goh – Pixabay

 

BOŽIĆ

  

Piše: Đurđa Vukelić Rožić

 

Kak su išli dani Božića ja sem vuz pomoć sinergije¹ i multitaskinga² bila uspešna da ni za veruvati. Projekt zvan Božić je išel po planu, vse kaj sem odredila da bum naredila rešavala sem kak raketa na warp* pogon. Vuz posel koji se mora obaviti oko šparheta, štale, živadi i hiže došli su drugi posli. Trebalo je brže hodati, menše spati i vsaku minutu još bolše skoristiti nek inače. Zorganizerati se, i to kak!

Na Božić, red je doma biti a naša deca znaju da je dom tam gde su otec i mati, de su odrasli. Da denes-zutra budu svoji³. Gda imaju svoje dvorišče, most, grabu, livadu, gaj, gde su se s bracekima, sestricami i malim susedima igrali, svoju cestu kaj su po noj v školu pešačili, navek imaju sečanja v koja se moreju vrnuti a gda odrastu, i svoje ljude s kojima je podele. To je bogatstvo dobro za emocionalni razvoj osobe, prema Googleku, a komaj sem to zapamtela, ti „emocionalni razvoj osobe“. Jer mi smo hiperdruštvena bića i to nemremo premeniti. To je onda još od doba gda smo v plemenu živeli i dobro nam je išlo, poglečte kolko nas je na svetu vsake fele i kak smo lepi i pametni, gda nismo bedasti. Gda je ko čul arheologa ili prečital da piše o tomu kak je pleme ostavilo pečinu i išlo na skijanje za Božić? Nigda. To je nova tradicija i moda za peneze zvleči z žepa i slikati se, špinčiti i faliti da bokci doma kaj je glediju na mreži i televiziji pokrepaju od zavisti. Moji imaju dojti doma a ne bežati pred lavinami po goram Evurope i delati mi brigu. Točka.

Nektera gospoda pripovedaju da smo mi seljaki zavostali jer marimo (hajamo, op. Ifkica) jeni za druge, a drugi pak, da putem toga socijalnoga integriranja ostanemo zdravi i sretni, pak nam vudre poreze na to. Nema zdrave srečice zabadaf, jok! Ak se mene pita kak popraviti svet vusamlenosti i otuđenosti, rekla bi da je to stvar našega vunzemalca (mozga, op. Ifkica). Po tom pitanju on se ni preveč premenil od špiljskih cajti, teško se privuči na promene, zeme mu puno jezera let naj bi se reseteral i preprogrameral, pak zgledi da je on zavostal, a ne seljaki. Da bi to skrili, o tomu školuvani pišu knjige a pacijenti, koji nikak razmeti kaj je na stvari a moreju dobro debelo plačati, ideju k njima na terapije kaj bi se navčili biti društvena stvorenja a ne bedariti v ti kak vele, vusamlenosti. Pri nam na selu toga ni. Ni v dobru ni zlu.

Vele stručnjaki da su si pojedinci sami zebrali tu otuđenost, pak su od nje oboleli! (Teorija izbora**, op. Ifkica), misleći da je to moderno i elitistički. Nečeju malo pretrpeti, ni lehko z ljudima! Jako je IN (prestižno, kool, popularno, op. Ifkica) sam mreti vu velikom gradu, na kavuču v stanu a da niko vu zgradi za te ne pita i ne primeti da te dugo ni za videti ni čuti! Pri nami v provinciji, po zimi, gda se nejde preveč z hiže van pak nikterega ne vidiš na vrtu ili polu (prede nek je gospon Bell telefona zmislil, a bome je dugo zelo da se probije do našega sela, nekak pred Domovinski rat. Struji saka čast, dobili sme ju mam posle Drugoga svetskoga rata, op. Ifkica), pratimo rafunge svojih susedov. Če se na primer, z dimnjaka na Krivušičkine hiže do poldan ne dimi, ja v svoj fertun zamotam suhi sirek i flašičku rakije i odem k njoj, toboš joj nosim darek, naj bi vidla jel vse v redu. Am žena živi sama, ko zna kaj se more stati. Ak ide z doma, rečimo v toplice ili k deci, ona nam se javi i mi pazimo na nejnu hižu. A retko falešna (opaka, op. Ifkica) nađak-baba!

Gda dojdu Božićni dani, ja najrajše vse sama skuham i spečem, naj si čeri i snehe, a sad i vnuke malo počineju od posla i brig v civilizaciji. Vuz molitvu zafalimo za to svoje skromno, jednostavno i seljačko obilje, poprosimo Svevišnjega za ljudsku pamet i dobro serce naj bi bil Mir. Setimo se maslečnih i prebogatih koji delaju zlo po svetu, za nje poprosimo naj bi pregledeli i sreču našli za se, pak ju ne bi krali sirotinji. Zapopevamo si naše božićne prelepe popevkice. Gda vsi skup odemo na polnočku, mam je to frtal cirkvice pun moga i Jožekovoga naroda! A ja sam zafalna i visoka skroz do stropa cirkve a, če očemo po istine, to je fanj visoko. Gda Kraljica Hrvata zvoni do neba, mene strefi ti kak vele pravi pravcati flow*** …

Dva dana pred Božić, vse je išlo po planu. Bila sem kak tica, letela po hiži i okraj peči i pri tom silnom poslu mam v jutro Krivušićka je došla sedeti k meni. Za neveruvati! Dimnjak joj je bez dima, kak golovratkov vrat ober krepane hiže a ja u brigi za nju a ona se došla k meni grijati. Lepo bome. Ti čas se moj celi plan i projekt posmeknul kak da tici krila podrežeš. I onda neš Ifkica letela! Vu te dane po selu idu samo oni kaj niš ne delaju. I inače je to tak, ali pred Božić, to bome ni kulturno ni lepo. Veli Krivušićka da je vusamlena i v depresiji. A meni, podne mam tak rano v jutro.

Božić je i treba pokazati ljubav i strplenje za ljude, čak i veče nek inače. Žmulim, grizem vusnicu. Pak depresija? Bome ju prime ko naručene prek interneta. Morti je to samo déjà vu (već viđene, op. Ifkica), i ni po istini. Tak me je i za lanjski Božić z mokrom krpom lupila a i za Uskrs proletos. Išla sam se ze Googlekom savetuvati po pitanju te nejne depresije i zaključila da to morti ni prava depresija već ona privremena, blagdanska. Ak se mene pita, ta dijagnoza je onda ono gda te primi lenost i neće ti se kolače peči, suđe prati i goste dočekivati. A zakaj onda ne pobegne v toplice peneze hitati za toplu vodu, nek dojde mene danjgubiti?

Sela si je ravno na čelo stola v kuhinji, a dobro zna da je to Jožekovo mesto. Če on dojde v hižu i vidi ju, ne bumo dobro prešle ni ona ni ja. Ja sem tancala zmed peći i stola. Z modlekima sem rezala kekse od prhkoga testa z orehima. Jenu turu sem vadila z rola, prelevala s limun-ajsingom (od. icing engl., premazivanje glazurom, ice – led, op. Ifkica) a drugu z rastoplenom čekuladom na mreži kaj mi je Jožek naredil v svoji radioni tak da posle poberem čekuladu i pak ju skoristim, šteta hititi. A drugi se protvun pekel. Vse je to jako zahtevno i treba biti spretna i fletna babica, kak na traki v tvornici. Pak jen pekač brže bole v rol, da skoristim ogenj v peći i zašparam drva. Onda dale režem, srčeka, medeke i zvezdice i slažem na pleh. Male pečene boreke premažem z belanjkom i posipam s šarim mrvkami. Ili naseckam orehe. Ovo leto je naš oreh tu pri hiži tak rodil da smo troje tačke nabrali, fala Bogu. Kifleki se nesmeju prepeči, onda su žufki i ne valaju. Samo malo porozaste na dolnoj strani i još se dopeču od vnutarnje temperature, gda se lade, inače šteta muke i cajta. Če vlovim koju minutu, rolam kuglice od marmelade od marelic z mlevenim orahima. Vučetičkin⁴ recept.

Na jogenj v peći treba se jako paziti. Na modernim pečima, okreneš gumb na rečimo 180 °C, žarulica ti žmigne gda je temperatura postignuta i nemaš brigu. A jezera let su žene pekle v pečima na drva, žarulice su imale v glavi. Vele ti vantropologi, v špilami se peklo na vručemu kamenu! Razbelene, kamene su hitali k mesu i povrču v kožu jelena, mamuta ili bizona i tak se zuspeis (čušpajz, op. Ifkica) poriluk onda kuhal. Ak Googlek laže, lažem i ja.

V tomu božićnom muvingu (moving, enlg. kretanje, akcija, polet, op. Ifkica) Krivušićka probava me kifleke, breskvice, šape i volovske oči kak da je hiče v runjak na pleči. Bez poštuvanja i zafalnosti. Ni primetila ni kak su lepi, fini i drobe se v požeraku, ni je ni žvakati treba. Morti je sirota žena bolečna, nejni mozek pol dana ne primeti da je želudec pun. Ili je zločesta i jalna pa mi oče se požrati da se nem falila. Ili me mrzi zato kaj sem vredna a ona se nemre uputiti v to da počne biti vredna. Nikak taj svoj leap narediti. (Po knjigi o samopomoći, J. Peterson, op. Ifkica kaj sem ju na pošti kupila). Kak sem z protvuna vadila novu turu na štaubcukorek na taci, još je onak vruče gutala i lečila depresiju. Bomes sem bila dobra doktorica a me kolačeki terapija. Činilo mi se da je nejni virus prebegel k meni, skurval se i postal skroz drugački i skoro sem joj rekla kaj ju ide! Nis se ja protiv gluposti i zločestoče ljudske cepila! A grdo bi to zgledelo, am su dani Božića! Strplen-spašen, strplen-spašen, tak sam si ponavlala mantru³, kak me uputil moj Googlek. A i moja babica mi je to navek savetuvala. Strplen-spašen. Kaj bi tek bilo da je moja super-babica imala Googleka, eh!

Štela sam preštimajoj gospi-susedi ma ladanju reči da bi se napol zlečila od depresije če bi pekla svoje kolače, oprala obloke i firange na hiži, pozubatala lišče po dvorišču, kosila travu, sadila cveće i tak to. Imela bi satisfikaciju (zadovolstvo, op. Ifkica) s tim da je nekaj lepoga i dobroga naredila a hižica i dvorišče bi bili nejna slika. I bi se razgibala. Če si niš koristi, mam padneš v depresiju, mislim ne onu pravu betegu, več ovu kaj si zmisliš, kak je ležeše, a to je onda prokrastineranje⁴, ak očemo za prav. Lenčina si vse posloži. A Internet vse zna i puno toga navči babicu kak sem ja, fala mu za to. Negda nisu puno toga v školama nas decu vučili a pol vsega toga ni onda niko ni znal. Svet ide napred, moraš se boriti da te ne ostavi pod repom.

Ni da se falim, ali istina je da ja napečem pune velike, drvene veš-necke kolačev za Božić i nemam cajta za blagdansku depresiju. Ni mislit. Umorna od vsega, spim kak mali micek v vuneni štumfi. Tak sem vidla babicu, mameka, tetice, kume i stareše sestre da delaju, pri nami je to normalna stvar. Odgoj. Ja se veselim vsakom tom londoneru, a gda mi ni jena kora za mađaricu ili medenu pitu ne spuca, niko sretneši od me. Špinčim se sama pred sebom da niko ne zna, pak se pošpotam kaj da sem prava pravcata špinčekica! A gda je ktera od nas sestric, babic, ili kumica betežna ili rodi oko Božića, i nejna hiža dobi kolačev i sega, Božić pripada vsima i red je pomoči oko toga.

Osim toga, volim to kaj delam. A zakaj? Pa, kaj je to tak teško razmeti – gda stvaram to kaj volim ze svojim rukmi i na svoji sirotinji, osećam se živa! Mlada! Gda vnučeki dojdu a ja skinem našivavani stolnjak i otkrijem pune necke kolača, pak te rukice gda počneju zimati, oči glediju, v škatule si pakiraju za doma zeti i za pajdaše ponuditi, to je sreča. Obečanje da bu vse na dobro zišlo. Zafaljujem za svoje ruke kaj me celo živlenje tak verno služe. Valda je i to onda ti the flow.

Pripoveda mi Krivušićka s punim vustima, a moji kolači bokci samo gineju tam kak v krateru vulkana bez dena, da se ona ne bu mučila i ne bu pospremala hižu za kojekakve goste, župnika i zvonara, ni mislit! I još im onda za tu svoju muku morala i platiti! Ona ne bu trpela kojekakve čestitare kaj budu došli jesti i piti i hižu zamazati! Ni ju briga kaj ni popularna, joj ni treba veliki sprevod!

Bome sem se zamislila. Ja za Božić na obluke denem heklane firunge kaj mi je pokojna baba Marica dala gda sam se udavala, pak je onda i ona z nami. Kauče i fotelje preslečem v novo oblačilo, vanjkuši su s pečkim i kosovskim vezom kaj smo moje sestrice i ja još ko curičke pri lampi našivavale. Tak je i naša mladost z nami. Otec nam je prerisaval mustre z alumijskom žlicom ze starih koperti i stolnjakov na novi šifon tak su starinske mustrice ostale z nami. I brati su pomagali. Moj pokojni bracek Mirek je tak lepo crtal i zmišlal mustre … Sad mi je drago kaj je imam na tabletićima našite. Vuspomene. Pak onda i v tom smislu nis ni sama ni otuđena. Nikak razmeti kaj je na stvari s tim današnjim svetom.

Gda oko Sveta tri krala dojde župnik blagosloviti hižicu, veseli me da je vse lepo čisto, da sam pri snagi i sama vse naredim i da ga imam s čim ponuditi. Ni on ni žedni ni gladni, ali sejeno. On blagoslovi našu prošlost, sadašnjost i budućnost. S druge strane, gda deca odu i župnik prejde, Jožeku i meni preti opasnost od te post-blagdanske depresije i vusamlenosti. Ali, mi se nedamo. Če nas nisu rati, betege, beda, pandemija i druge ljudske bedastoče hitile z kolotečine, kaj bi to nekakvi vusamlenosti uspelo, ili ne daj Bože ti, depresiji!

Kak je išlo prama Badnjaku, a deca samo kaj nisu počela dolaziti, oblačila sem postelinu i postele spremala, zvlačila nejne šlape, prala tanjure i zdele, escajg kaj ni dugo rablen. Moj Jožek več zna; mora mi se meknuti s puta gda me primi to moje letenje! Jenput mi je rekel da se ob Božiću pomladim, da sem kak lastavica, i tak je lepo zalubleno za menom gledel. On je trebal dvorišče počistiti dok još ni snega, pozublati vse oko drvocepa, omesti pavučine po štaglu, štali i dvorišču, kravice i konje očesati. Gda dojdemo z polnočke, podelimo malo blagoslovlenoga kruveka žnima.

Gda su se deda i vnuki vrnuli s borekom na kolima, ni snega bilo za sanjke zapreči, (dovezli su dva, jen su mam vuzput ostavili susedi Božici, pokojnoga Petra udovici). Posle obeda, vnučeki i vnuke su išli na tavan po škatule z nakitom i kuglicami! A tam vise bele kobase, češnjovke, suha rebrica, komadi šunke. Sprezvušt bu stradal! Najkuražneši med decom dojde v kuhinju i skrivečki zeme celi kruhek pak pobegne gore. Jožek je velikim dečecima znal reči naj nikam nejdu bez maloga žepnoga nožeka. Kebe. To je na selu zakon, a pogotovu tam gde tavan ni prazni. Naredil je i lepu, novu desku za rezanje i odnesel gore na kištru s šenicom. Kobere je prestrl da imaju gde sedeti. Da mi je bilo videti je!

     – A kaj delate tak dugo gore, deca?

     – Iščemo kuglice!

     – I niš drugo ne delate? Niste v kvaru?

     – Tražimo darove, kam si je skrila?

     – Treba i oni bor vani kaj pred hižom na slivaru okititi, ko ide z menum? Imam tu žarulice priređene, onda?

 

Mam primetim gda počnu pripovedati po domače. Ne budu pozabili! To mi srčeko zgrije. Ali, nisu se šteli puno spominati da ne bi čula kak imaju puna usta! Nek! Zato smo se mučili! Naj su si dobri, pa gda se v živlenju zestanu tu i tam, na svadbi, sprevodu ili krstitkima, budu se setili kak su na tavanu delali uspomene ko deca, kak je pri babi i dedi bilo! A morti neko i knjigu napiše kaj se ne bi pozabilo. Deci treba dati svoje vreme, ona moraju znati da su najvažnejša točka v živlenju svojih starih. Bratići, sestrične, moraju rasti skupa kaj bi si pomagali, a nejna deca imala tetice, vujne, strice, kume. Kaj bi bili svoji, svojta kak se spada. Na Božić i celo leto. S internetom ili bez njega, tak je od starine.

 

¹obavljanje više od jednog posla istovremeno
² višezadaćnost
³ Pjesma „Budi svoj“, August Šenoa (1838. – 1881.)
⁴Mira Vučetić, autorica Zlatne knjige kuharstva
⁵više ponavljanih slogova pri meditaciji
⁶izbjegavanje

 

*warp pogon – raketni pogon iz djela naučne fantastike
** teorija izbora – **William Glassner (1925.-2013.): Teorija izbora, Psihologija osobne slobode
***flow – u pozitivnoj psihologiji, zanesenost, sreća tijekom bavljenja nečim ili druženja s određnim krugom ljudi

 

Manje poznate riječi:

šparhet – peć; živad –perad; fela – vrsta; špinčiti se – hvalisati se; zabadaf – besplatno; zebrati – izabrati; rafung – dimnjak; maslečni – podmukao; koperta – prekrivač za krevet; mustra – uzorak; zestati se – sastati se;

 

 

O autorici: Đurđa Vukelić Rožić

Rođena 6. travnja 1956. u Vidrenjaku, u Ivanić-Gradu živi od 1964. g. Hrvatska književnica, članica DHK s objavljenih 25 naslova. Osim haikua objavljuje kratke priče, humoreske i poeziju. Piše na hrvatskom, kajkavici i engleskom jeziku.

Uredila niz zbirki, zbornika, časopisa i antologija iz područja japanskih pjesničkih formi na hrvatskom i engleskom jeziku. Među osnivačima Udruge “Tri rijeke”, kloštranskih i ivanićgradskih haiku susreta, glavna i odgovorna urednica časopisa IRIS (tiskovina) i IRIS International (web časopis) za haiku poeziju, potonji na engleskom jeziku. Glazbeno obrazovana, amaterski se bavila glazbom. Diplomirala na Ekonomskom fakultetu u Zagrebu.

Za haiku nagrađivana šezdesetak puta u Hrvatskoj, Japanu, SAD-u, Italiji, Rumunjskoj, Engleskoj, Novom Zelandu… Izdala je 7 dvojezičnih zbirki haiku poezije. Godine 2011. nagrađena “The Touchstone Award” američke udruge The Haiku Foundation za uređivanje Antologije hrvatskoga haiku pjesništva “Nepokošeno nebo / An Unmown Sky” 1996.-2007., u izdanju Udruge “Tri rijeke” HPOI Ivanić-Grad, 2011., a 2012 g. Zagrebačka županija dodjeljuje joj Nagradu za doprinos ugledu i promociji Zagrebačke županije u zemlji i svijetu.

Đurđa Vukelić Rožić članica je udruge “Tri rijeke“ 

Udruga „Tri rijeke“ Haiku pjesnici Otoka Ivanića, Ivanić-Grad osnovana je 2006. g. u gradu Ivanić-Gradu s ciljem promoviranja haikua i inih japanskih pjesničkih formi te kulture Japana u Hrvatskoj i hrvatskog haiku-stvaralaštva u svijetu.

https://tri-rijeke-haiku.hr/home/

Komentiraj

Please enter your comment!
Please enter your name here